البرلمان المصرى يكشر عن أنيابة ( تتاتتااا )موسيقى تصويرية فيها رعب واثارة
بعدما فضايح الصناديق الخاصة بقيت على كل لسان والى جاى والى رايح ملهوش سيرة غير مليارات الصناديق والبشوات الى عمالين يعبوا منة ويحطوا فى كرشهم ، قام اية بقا عبعال رئيس البرطمان اتنفض من مكانة اول ما سمع كدة وشعر راسة وقف وحلف بالطلاق انة لازم يرجع فلوس الناس الغلابة الى كانوا بلعينها الناس الكبار ، امال اية ، وراح جامع رجالة المجلس ( الستات لا ) علشان مش حيستحملوا المنظر الى حيشفوة وهو ورجالتة بيقطعوا الحكومة حتت صغيرة ، وقلهم بينا يارجالة وراح ماسك الحكومة وحطها فى مزنق وزعق بعلو صوتة وقال < نلتمس من الحكومة ضم اموال الصناديق للموازنة العامة للدولة > الحكومة اول ما سمعت كلمة نلتمس وركبها فكت من بعضها وجاتلها كدة زى رعشة ، وقَعَدت تضرب أخماس فى أسداس ، وقَعَدت تلطم على وشها يهديك يرضيك أبداً عبعال دماغة وألف جزمة وهو على صرخة واحدة من صباحية ربنا حتيجبوا الصناديق يعنى حتجيبوها ، المهم قعدوة بالعافية صحتك يا عّم الحاج لو جريتلك حاجة محدش حينفعك راح رئيس الوزراء طلبلة واحد ليمون عبعال مارضيش علشان الحموضة و قالة بلاش ليمون خليها شاى بالياسمين بس شفتطين بالعدد وبقا رولاكس على الاخر ، صعبت علية الحكومة ونقح علية عرق الحنية برضك حرام لما يصدم الفاسدين كدة مرة واحدة دة ممكن يروحوا فيها ، المهم عبعال قالهم خلاص حناخد النص وأنتم النص ، ردت علية الحكومة ( كدة كتير يا معلم ) عبعال شرب شفتطين كمان وقالهم اخر كلام احنا ناخد الربع وأنتم حلال عليكم التلت اربع الحكومة يا ولداة حتعمل اية ، قالت لة < ظلم ظلم > زى فاتن حمامةفى فيلم النهر الخالد ، عبعال شخط فيهم وقالهم بس ياض انت وهو مات الكلام الشعب الربع وأنتم التلت اربع
وخلاص ويجعلة عامر
