أجرى الحوار مارك رياض
دائما تحتاج المواهب الشابة إلى الى دعم معنوى ونحن اليوم بصدد فتاة شابة متعددة المواهب . نتنبأ لها بمستقبل باهر ولكن لانعرف فى أى مجال . الغناء – التمثيل – الإخراج – دعونا نسألها شخصيا ونعرف منها فى أى مجال سوف تتخصص
ممكن تعرفينا بنفسك اكتر ؟
رحاب حسن
3 كلية الألسن قسم اللغة الروسية بجامعة عين شمس ممثلة و مطربة و مخرجة مسرح و مدربة صوت و تمثيل مثلت و غنيت بثلاث لغات (عربى/انجليزى/روسى ) بعمل عروض مسرح غنائى سواء كممثلة او مطربة او مخرجة بالثلاث لغات مثلت اسكندرية فى كتير من مهرجانات المسرح أمام وزراء الثقافة والشباب و الرياضة
ممكن نعرف ايه التكريمات و الجوددايز اللى حصلتى عليها لحد دلوقتى ؟
– اتكرمت من وزير الثقافة الأسبق دكتور جابر عصفور للتميز الغنائي
– حصلت على المركز الأول فى مهرجان كيمت للشخص الواحد فى دورته الأولى بأول ميوزيكال مونودراما فى مصر
– حصلت على لقب الطالبة المثالية على كلية الألسن لسنة 2015
– حصلت على لقب احسن ممثلة مسرح على الجمهورية مرتين خلال فترة الفنون المسرحية بالمدارس
– حصلت على المركز الأول جمهوري سواء كممثلة او كمخرجة مسرح فى الفنون المسرحية بالمدارس
– مثلت جامعة عين شمس كمطربة أكثر من مرة و باللغتين العربية و الروسية
نقدر نعرف بداية اكتشافك لكل موهبة كانت ازاى ؟
– بالنسبة للتمثيل .. كان عندى موهبة التقليد من وانا صغيرة جدا و بعدها فى اعياد الطفولة فى الحضانة شاركت فى حاجة بسيطة و مثلت و من ساعتها بقيت بشارك ف عروض الفنون المسرحية فى المدارس و كملت بتأسيس فرقة مسرح غنائى
– بالنسبة للغنا.. كنت دايما بدندن حاجات بسيطة و اقلد المطربين و بقيت بشارك فى حفلات كورال المدرسة لحد ما فى 3 ثانوى قابلت مايسترو و اتدربت معاه فى إطار عرض مسرحى غنائي و من ساعتها بطور من نفسى و أغنى
– بالنسبة للاخراح ده جه من خلال مشاركتى فى العروض المسرحية و الغنائية كتير جدا فبدأ يظهر عندى رؤية إخراجية و رأى و من ساعتها اترشحت فى حاجات بسيطة كتجربة و كملت الحمدلله بجانب الغنا و التمثيل كمخرج و كتير كمخرج منفذ لعروض مسرحية بجانب مخرح العرض الاساسى
هل فى مواهب تانية غير دى ؟
اه صممت استعراضات فى عروض قبل كدة (كيوجرافر) يعنى , كله له علاقة بالفن
ليه بما انك متجهة للفن كدة مدخلتش كلية ليها علاقة بالمسرح و الفنون و تكون فى اسكندرية ؟
كان هدفى انى ادخل السن لانى بحب اللغات و مفيش السن فى اسكندرية بالإضافة انى حابة أكون فنانة مثقفة و عندى شغلى و شهادة كويسة أقدر اشتغل بيها علشان لو فى يوم قررت أوقف الفن الاقى شغلى ميبقاش بس الفن شغلى كمان علشان اللغات تساعدنى فى شغلى الفنى انى امثل و أغنى بأكثر من لغة و كمان ثقافة ليا
هل للاسرة دور فى تدعيمك كفنانة ؟
اه جدااا والدتى بتدعمنى فى كل حاجة بعملها و اخواتى كمان
اكيد لكل شخص موهوب بيكون فى مثل اعلى , مين هو / هى مثلك الاعلى ؟
عمرو دياب و كاظم الساهر
تفتكرى ايه هى اول اغنية حفظتيها و كنتى دايما بتغنيها ؟
اه بعد الليالى ( عمرو دياب )
ايه هى الاعمال اللى بتعتزى انك شاركتى فيها سواء مسرح او غناء ؟
كمسرح كتير جدا .. زى انى عملت دور الملكة آسيا زوجة فرعون مصر عن عرض (ابن النهر) قصة سيدنا موسى و كان عرض غنائى أتعرض كتير جدا و من أهم الجوايز اللى أخدتها كان تكريم من وزير الثقافة الأسبق دكتور جابر عصفور (تميز غنائي) .. و عملت كمان (ميوزيكال مونودراما ) عرض مسرحى غنائي كنت بعمل فيه 5 شخصيات و بتكلم عن حياة البنت و حصلت بيه على المركز الأول فى مهرجان كيمت للشخص الواحد .. و كمان ادوارى التاريخيه أثناء فترة المدارس .. أما الغناء فلقد شاركت فى أوبريت أثناء فترة افتتاح قناة السويس أمام العديد من الوزراء و المحافظين .. و كمان شاركت فى افتتاح مهرجانات كتير جدا مثلت فيها اسكندرية .. و كمان شاركت بالغناء فى تترات على الاذاعة و التليفزيون اذاعة الشباب و الرياضة (تترات تصفيات كاس الامم الافريقية ) و كمان حفلاتى اللى غنيت فيها باللغة الروسية فى المركز الثقافى الروسى
ايه اغرب موقف حصلك فى حفلة ؟
واحد جالى هو و عيلته اولاده و زوجته و بيقوللى يا نجمة احنا بنحبك اووووى و متابعين كل اعمالك و ممكن نتصور معاكى اتصوروا فعلا معايا كتير جدااااااا و انا استغربت جدا لأن ده كان من 3 سنين ولسة يعتبر ببدأ وفى الآخر سألته هو حضرتك تابعتلى ايه ؟ قاللى كل أعمال حضرتك اللى فى التليفزيون , اكتشفت انه مفكرنى نيللى كريم
بتتضايقى من النقد ؟
لا خالص و بتقبله و بحاول أشتغل على العيوب بس احيانا لما شخص بيقول نقد خاطئ يعنى حاجة مش موجودة او هو اصلا مش فاهم بتضايق
شخصية فنية قديمة كان نفسك تقابليها ؟
ام كلثوم و عبد الحليم حافظ و اسماعيل يس و رشدى اباظة
ايه هوايات رحاب حسن بعيدا عن الفن ؟
القراءة و الجرى
شايفة رحاب حسن فين كمان 5 سنين ؟
ان شاء الله ممثلة و مطربة معروفة إلى حد ما
امتى ممكن نشوف البوم غنائى لرحاب حسن ؟
حاليا مش بفكر فى الموضوع ده يعنى ممكن مش قبل 4 سنين ان شاء الله
مفكرتيش تقدمى فى مسابقات اكتشاف المواهب ؟
فكرت طبعا بس كليتى اخدة وقتى خصوصا انى من اسكندرية و الكلية فى القاهرة بس أن شاء الله ناوية بعد ما اخلص كلية اقدم
رحاب حسن بتحلم بايه على المستوى الفنى ؟
يكون ليا اسمى و أكون مثال للفنان الجاد يعنى ابقى قدوة كويسة لغيرى , و اسيب علامة ليا فى الفن للأجيال الجاية يفتكرونى , و أشارك فى أعمال عالمية سواء غناء او تمثيل مسرح او سينما
حابيين نعرف ايه هى اخر اعمالك ؟
آخر حاجة كانت اغنية سنجل اسمها (بتبلى عليه) و دى كانت أول اغنية سنجل ليا بس غير كدة بستعد للامتحانات و متفرغة.. بس حاجة واحدة جانب الدراسة انى اترشحت واحدة من مديرا مهرجان كيميت للاستاند آب كوميدى و ده من اكبر المهرجانات اللى بتقام فى مصر فى مسرح اوبرا ملك
فى النهاية عايزينك توجهى رسالة لجمهورك
أحب أشكر اللى يعرفنى او ميعرفنيش بس بيدعمنى و أحب اقولهم يا رب دايما بيدعمونى بس انا محتاجة دعمهم اكتر الفترة الجاية ان شاء الله و اوعدهم انى هقدم حاجات أهم بكتير من اللى عملته و حاجة تليق بيهم و يا رب تعجبهم
