وداعا خالي سعيد غبريال ….
كنت معاك من سنة واتفقنا مع بعض انك لما تموت أكون حاضر علشان اعمل لك ميتم يليق بمكانتك عندي . أنت ضحكت وقلت لي تخيل وانت في صوان الميتم تلاقيني قدامك رجعت تاني.. انا قلت لك أنت بطل والموت مش هيقدر عليك … فاكر يا خالي سعيد حكايات شاخر وناخر ال ملهاش اول من آخر ال كنا بتحكيها لينا .. طيب بلاش شاخر وناخر انت فاكر حكاية الراجل عوال الهموم .ال كنت بتحكيها وتقول كان فيه راجل عوال الهموم . عمره ما كان رايق مع اولاده ولا بيته. وجه في يوم كان مزاجه رايق مع اولاده وامراته كانت فرحانه بمزاجه وعملت اكل كويس من جميع الأصناف وأثناء ما هو جالس مع اولاده بياكل دخل ابنه الصغير قال له الحق يا ابويا عم فلان حمارته ولدت جحش من غير ودن ولا ديل .. عمنا عوامل الهموم راح قلب الطبلية بالأكل وقال يا نهار اسود ومش فايد .اولاده قالوا له ليه كدا يا ابويا قلبت الطبلية ليه .. قال لهم افتراضا الجحش كبر وواحد ركبه والجحش وقع في مجرة ميه .. نطلعه اذاي . وهو ملهش ودن ولا ديل… طيب بلاش عوامل الهموم يا خالي سعيد انت فاكر حكايات الطير ال اسمه شكلكل ال بيلم الاشكال علي بعضيها…ياااااه انت فعلا مت يعني مش هنحكي تاني مع بعض حكايات ونضخك .. ياااه هو فعلا اروح عندك البيت مش هلاقيك قاعد علي المصطبه خارج البيت والناس حواليك بتسمع لحكاياتك وتضحك … يااااه يا خالي سعيد .. فاكر امثالك الجميلة ال كنت بتقولها . حظك يا ابو العلام في المعزي راقد عشروا الاثنين جابوا جدي واحد….فاكر زكرياتي معاك. فاكر يا خالي سعيد لما انت كنت تدخل اي مكان والناس تشوفك كله عاوز يكلمك ويضحك معاك وكله عاوز يسمعك وكله يسأل عن حكياتك… فاكر يا خالي سعيد … فاكر لما كنت بتقول ال ربنا يرضي عليه يعطيه دار وسيعه وحمارة سريعة وامرأة مطيعه…يااااااه يا ابو دبيكي هتوحشني كتير قوي قوي . اذاي انزل مصر وملكقش منتظرني قي المطار او البيت . علشان اسمع آخر حكياتك ..ياااااه يا بطل . فاكر عمدة أبو تشط . طيب فاكر طشمه بنت قللي …يااااه طيب فاكر آخر مرة انت تعبت فيها وقطعت النفس ونقلوك العناية المركزة بالمستشفي والكل كان مستعد علشان يغسلك ويدفنك… وانت فجأه قمت تهزر وتقول حكايات وأمثال ….هما قالولي من امبارح انك تعبان في المستشفي وحالتك متاخره قلت لهم ابدا البطل أبو دبيكي هيقوم دالوقت يضحك ويهزر ومش هيموت غير لما اكون معاه…. أنت ضحكت عليا وسبتني.. ورحلت . كنت افكرك بتهرج. لكن قالوا لي دا فعلا مات قلت لهم انتظروا شوية يقوم د الوقت يهرج قالوا لا خلاص مش هيهرج تاتي دا مات . . . قلت لهم محدش يقدر ياخدوا مني . قالوا بنقول لك ماااااااات خلاص مفيش لا شاخر ولا ناخر …… وداعا خالي ابو دبيكي
