.مدرستي نموذجيه…..( خمسه فرفشه )
تعلمت من مدرس العربي أسماء الإشاره
من مدرس العلوم بطوبتين أعمل شراره
بتاع الرياضيات…..عصبي…..بيقولوا شال المراره
مدرس التاريخ…..علي ودانه…..ساند النضاره
ومدرس الألعاب…..ف إيده ع الدوام صفاره
مدرس الجغرافيا…..مشتاق…..يطلع إعاره
ومدرس الأحياء…..رابط البنطلون بدوباره
مدرس الفيزيا…..غايب النهارده…..عنده حراره
ومدرس الكيميا…..بيتكلم…..بالقطاره
أمين المكتبه…..حاطط عراقيل…..أمام الإستعاره
مدير المدرسه…..مُدمن…..للبايب والسيجاره
مدرستي نموذجيه…..عِلم…..فن وإداره
محمد صلاح…..هدفه…..أجمل جون
محمد صلاح صاحب أجمل وأحلي جون
رافع راس بلدي…..العالم بيحبه بجنون
سفير لبلده مصر…..الله يكون ف العون
علي قريته وعائلته…..وجدناه…..حنون
بالفعل مصري أصيل…..بالحق إبن فرعون
اليوم العالمي للمعلم…..( خمسه فرفشه )
مدرس العلوم مُغرم بالكلام عن الفلز
مدرس الرياضيات باين عليه إبن عز
مدرس التاريخ علي لسانه كلمة طز
مدرس الألعاب ع الدوام للوسط يهز
مدرس النشاط عايزنا نربي بط ووز
مدرس العربي كلامه عن الإعراب مايلذ
مدرس الجغرافيا دايماً علي شفايفه يكز
ناظر المدرسه…..تخين…..بيحب الرز
.هجره…..
صعب ع النفس تسيب البلد وتهاجر
ألم وضيق…..تمام زي…..طعنة خناجر
سواء طالب أو موظف أو حتي تاجر
وتقول ماعندوش إنتماء…خاين وفاجر
ليه م الحياه وأحوال المعيشه ضاجر
ياصاحبي الهجره صدقني مش بسبب الفلوس
المشكله ف الناس…..المعامله …..والنفوس
المحبه ضاعت…..شكليه…..أحضان وبوس
تسمع مواعظ…..والنتيجه…..سلوك معكوس
نميمه وتشكيك…..وتعليقات…..تخليك مفروس
فساد ورشوه…..سرقه…..للأسف عاده وطقوس
الناس ف الشوارع…..ماشيه بتكشيره وعبوس
الإرهاب والتشدد…..ف المصالح…..مدسوس
التسامح وقبول الآخر…..محذوف…..م الدروس
مش بس عمي وخالي…..
خايف أهزك يا غربالي
يقع إللي فاكره عزيز وغالي
ليه ياصاحبي مش سايبني ف حالي
باصص علي نصيب…..من حق…..جالي
مضطر أبني سور…..بيني وبينك عالي
مع إن الوصيه…..تتعارض مع كلامي
يا رب الأرباب…..إستمع…..لطلبي وسؤالي
أحب كل الناس…..مش بس…..عمي وخالي
بطاطس…..
أيه إللي جري للبطاطس…..السعر أصبح نار
هي والطماطم…..الظاهر…..بينهم تار
ياتري العيب م الحكومه أم من التجار
خايف يقولوا السبب…..اليورو والدولار
فين رقابة الدوله…..يبدو…..عايزه سونار
إرحم يارب عبيدك…..أنت عظيم جبار
