الخلاف بين الزوجين له آداب ونظام ..
من مصلحة بيتنا وولادنا قبلنا إننا نعرفها
مع أخذ في الاعتبار إن شخصياتنا مش نسخ من بعضها .. يعني احنا عارفين إننا مختلفين في التربية والنشأة والأسلوب والعادات واحتمال في المستوي الاجتماعي كمان
وحتي في اُسلوب الأكل وتفضيلاته .. مثلاً كل واحد فينا شايف إن طبيخ مامته أحلى حاجه في الدنيا وهوه ممكن مايكونش طبيخ أصلاً 😂 بس هوه ده اللي اتعودت عليه..
جواز يعني خلافات واختلافات متوقعة (خدو بالكم) من متوقعة دي..!!!! مهم قوي
علشان نعدي أول سنة جواز -ودي أصعب سنة في الجواز- إننا نتفق علي نظام الاختلاف والخلاف في البيت علشان خلافاتنا تعدي علي خير ونكمل مع بعض
١-عبري أو عبر عن اعتراضك أو خلافك مع زوجك أو زوجتك بأدب وبموضوعية وبصوت واطي والتزم بالاحترام في انتقاء ألفاظك … الوشوش هتتقابل تاني فمفيش داعي حد ينزل من نظر التاني
٢- وجود اختلاف فكري بينك وبين زوجتك لا يمنع من وجود واستمرار حياة سوية طبيعية، الاختلاف ده تكامل وليس تنافر ولا تنسى الاختلاف لا يفسد للود قضية
٣-التزمو بموضوع المشكلة .. مش لازم تفتحو لبعض كوارث عمركم من أيام ما كان عندكم ٤ سنين ..
٤-ما تسفهيش آراء زوجك أو تستخفي بها في أثناء الشجار. لأنك كده بتستفزيه وانتي اللي هتخسري النقاش (لأنك بتديه حاجه غلط فعلاً يمسكها عليكي)
٥- بلاش العبارات العامة “أنت دائماً..” أو ” أنت في حياتك عمرك ما عملت … ” اتكلمي في حاجة محددة وما تختزليش الشخص في موقف أو غلطة .
٦-وأنتو متخانقين اوعي تطلعو سر بعض بره .. لا تكشف سترها اللي هيه ائتمنتك عليه ولا تفضحيه بأي نقيصه ولا حتي لأقرب الأقربين
٧-لو حسيتي إنك لازم تشتكي .. تشتكي منه ليه هو نفسه وبكل أدب
… ولو ما انصفكيش اتكلمي مع أمه أو أبوه بعلمه وبعد إذنه
محدش من أهلك يسمعك بتشتكي منه
أهله هيشيلوها لك اإنك حريصهة علي ابنهم وعلي شكله قدام أهلك وحتى لو مش هايشيلوهالك وهمه اللي هيدفعوا عنك بعد كده ويبقو سندك ويبقى حافظتي على صورة زوجك جدا أمام أهلك بحيث لما يزوروكم ولا تزوروهم انتي وزوجك تبقى الدنيا جميلة والقلوب صافية … إنما أهلك عمرهم ما هينسو له إنه عمل أو قال كذا وكذا ويبقى اتصافيتوا أنت وهو والأهل يبقوا شايلين في قلبهم
٨- ما تنتقديش زوجك أمام الآخرين أو أمام الأبناء، اتعودي علي احترامه حتى في وقت الخلاف. وماتسمحيش لحد من ولادك يغلط في أبوه ولو حتي من وراه حتي لو كان الولد عنده حق في الاعتراض.. الاعتراض بأدب ووجهاً لوجه وبصوت واطي.
٩- اوعي تعلي صوتك علي مراتك قدام ولادك أو تسمح لحد من ولادك يعلي صوته علي أمه أو يهينها حتي وأنتو متخانقين.. انته بتحدد له مكانة المرأة في حياته سواء زوجة المستقبل أو أخته أو بنته .. انته كمان بتعلم بنتك إن احترامها واجب وأن أبسط حقوقها في بيتها إنها تعيش ست راقيهة ومحترمة
١٠- اإياكي تقلبي بوزك في وش حد من أهله وانتو متخانقين .. عيب قوي في حقك انتي كبنت أصول
١١-مفيش حاجة اسمها أنكد عليه..!؟ ده وهم حريمي صرف … انتي اللي هتتنكدي .. أغلب الرجالة بينسو إنك مخلوقة أصلاً وهوه بيقفل باب البيت وراه وهوه خارج (فقد ذاكره اختياري) اهري وانكتي انتي براحتك !!!
١٢- البوز ده قرار … الطرف اللي بياخده يقدر يستمتع بيه بقمة الحرية … احنا متجوزين .. يعني لما حد يزعل يقول للتاني ومحدش مننا عنده ضرابة ودع تحت السرير علشان تقول له ست الستات اتلوت النهاردة ليه .. اللي يتلوي يتلوي العمر مش بعزقه
خد لك ساتر لحد ما تفك لوحدها
لقطة خد بالك لوحدك …؟ انته مش حاسس انت عملت ايه..؟ ده فرااااااااااااغ
١٣-وأنتم متخانقين واجباتك ما تنقصش الهوا .. كل حاجته تتعمل وتتابعي صحته وطلباته وادويته .. الخلاف مالوش دعوه بقلة الأصل ولا النقص (الكلام للست والراجل) احنا ولاد أصول
١٤- مش كل الرجالة بتتضايق من نفس الشيئ … اسألي لو شكيتي في حاجه معينة إنها بتضايق زوجك وتجنبيها .. ونفس القصة مع زوجتك ❤
١٥- الكلمة الطيبة بلسم وراحة… لما تلاقي الدنيا والعة .. يا تقولي حاجه لطيفة يا تسكتي لحد ما الموقف يعدي .. شويه واشرحي وجهة نظرك (ما تسكتيش قهراً.. اسكتي عقلاً) لما تهدو اتكلمو بشويش وابقو اتفاهمو لحد ما توصلو لحل للخلاف
١٦- مفيش حاجة اسمها تباتي زعلانه من جوزك .. تطلعو عين بعض .. وتباتو في حضن بعض .. القسوة بتجيب قسوة وخروج من أوضتكم لا
الخناقات والمشاحنات الزوجية موضوع صحي و(شرا لابد منه) علشان نحس بقيمة الاستقرار والهدوء بعد انتهاء أي شدة أو خناقة أو خلاف.
كتير من الأزواج بيعتبرو إن الخلافات بين الزوجين نقطة مضيئة يمكن أن تقود إلى الحب الحقيقي. لأنها فرصة نعرف فيها قد ايه احنا مهمين عند بعض وبنستحمل بعض وبنفوت لبعض … وبنصبر بعض بعيوب بعض علشان نبقي أحسن … مش علشان نمسك سيديهات علي بعض 😂😂
كل العلاقات في الدنيا قائمة علي العدل … إلا الزواج … قائم علي الحب والتقدير
