حوار : داليا ياسين
مارك رياض … ممثل و مخرج و مؤلف و منتج مسرحيات و افلام قصيرة و ستاند اب كوميديان , للوهلة الاولى تتخيل انه فى الثلاثينات او الاربعينات من عمره لكنى سأصدمك عندما اقول ان عمره 21 سنة فقط !! , قابلناه لكى نحاوره و نعرف اكثر عنه و عن رحلته و طموحه الفنى
ممكن تعرفنا على نفسك اكتر ؟
انا مارك رياض , عندى 21 سنة ,طالب بكلية الالسن قسم اللغة الروسية , ممثل و مخرج و مؤلف افلام قصيرة و مسرحيات و ستاند اب كوميديان , عملت حوالى 6 افلام قصيرة و حوالى 18 مسرحية و مسلسل واحد مثلت فيه و بعض الفيديوهات ساخرة و 2 ديودراما
ممكن نعرف بدايتك الفنية كانت ازاى ؟
انا كنت بكره التمثيل جدااا و كنت دايما بشوف اللى بيمثل ده شخص خارق , كنت بستغرب ازاى ممكن يطلع على مسرح و يضحك الناس و يحفظ كل الحوار ده , فا كنت بكره التمثيل جدااا و دخولى التمثيل كان بالصدفة البحتة , فى يوم قابلت صحابى فى الكنيسة و كانوا مستنين مخرج المسرحية اللى كانوا بيعملوها و كان اسمها
( القديسة رفقة ) عشان يبدأوا بروفة و قالولى فى دورصغير فاضى و عايزينك تكون معانا ايه رأيك ؟
فا رفضت جدا و قلتلهم استحالة و قالولى تمام براحتك و سكتوا , بس لما جه المخرج قالوله ان مارك عايز يعمل الدور اللى فاضى , فا وشى قلب الوان و مقدرتش ارفض و قولتله ايوة انا عايز اعمل الدور
كان دور ايه ؟
كان دور جندى المفروض هيقول جملتين و يموت
و مثلت الدور كويس ؟
لا انا معملتش الدور اصلا , لان فى يوم كان عندنا بروفة و جيت فى ميعادى عادى جدا عشان اقول الجملتين اللى بقالى 3 اسابيع بقولهم دول و خلاص , فا المخرج جه و قالى مارك انت للاسف مش هتعمل الدور , فا استغربت و قلتله ليه ؟ انا مقصرتش فى و لا حاجة , قالى لا مانت مش هتعمل الدور ده عشان هتعمل دور اكبر شوية عشان اللى كان هيعمل الدور ده اعتذر لظروف ما , و فجأة دورى اتحول من جملتين لمشهدين كاملين
يعنى نقدر نقول انك محظوظ فى اول ظهور ليك على المسرح ؟
محظوظ فى الدور اللى اخدته , لكن مش محظوظ فى عدد المشاهدين اللى شافونى فى اول دور ليا , عشان اللى شافوا المسرحية بتاعتنا كانوا 3 بس , لاننا كنا بنعرض فى مهرجان و كل فرقة تخلص عرضها كانت بتمشى , و احنا كنا اخر عرض , فا محدش شافنا غير لجنة التحكيم و كانوا 3 حكام بس ( ضاحكا )
هل فى مواهب تانية ؟
اه بعزف جيتار, و بألف و بلحن و بغنى راب , و اقدر اقول انى مش بطال فى الخدع البصرية ( الالعاب السحرية يعنى )
هل كليتك ليها نصيب من موهبتك ؟
ليها نصيب قد كدة ( كبير جدا ) , انا اتشرفت انى شاركت فى مسرحية ماشا المسكينة للاديب العالمى ازمايلوف و عرضناها سنتين ورا بعض فى الكلية , فى اليوم العالمى للالسن و فى اليوم الثقافى الروسى الاول فى كلية الالسن و المسرحية كانت تحت اشراف استاذتى و معلمتى دكتور دينا محمد عبده
و بردو بعمل فيديوهات ساخرة عن كليتى و الحمدلله جابت مشاهدات كبيرة بفضل ربنا و دعم كل واحد فى الكلية من طلبة و أساتذة
هل الاسرة ليها دور فى دعمك ؟
طبعا , ليها دور كبير جدا سواء والدى او والدتى او اخويا جوزيف , بالمناسبة جوزيف هو اللى بيصور الافلام اللى بعملها و بيعمل المونتاج بتاعها , و مش هقدر انسى دعم شخصية عزيزة جدا لقلبى هى مصممة الازياء و المؤلفة الروائية فالن مدحت اللى دايما بتساندنى فى كل خطوة ليا
الممثل المفضل ليك ؟
هما كتير الصراحة
عربى : خالد النبوى , احمد مكى , احمد زكى , خالد الصاوى و يوسف الشريف
امريكى : توم هاردى , ادم ساندلر , توم هيدلستون
هندى : عامر خان , شاروخان
طب لو خيرتك ما بينهم كلهم تختار مين ؟
بدون دبلوماسية …. عامر خان
كلمنا عنك كممثل ..
انا مثلت حوالى 6 افلام قصيرة , في منها روائى و فى منها صامت و منها الكوميدى و التراجيدى , و حوالى 18 مسرحية و مسلسل واحد اسمه ( محكمتى فى مدرستى ) اخراج ميشيل منير و هو بيتعرض على قناة سات 7 كيدز و 2 ديودراما
و كمؤلف و مخرج ؟
انا عندى طبع ان اللى اقوم بتأليفه لازم اخرجه , مش عارف ليه , يمكن عشان بحس ان الحاجة دى ممكن لو حد عملها برؤية تانية غير رؤيتى ممكن متنجحش , يمكن! الله اعلم , انا ألفت و اخرجت 4 افلام ليا عشان فى فيلمين كانوا فكرة زميل ليا و كانوا صامتين مفهومش حوار , و ألفت و اخرجت 7 مسرحيات من ال 18 بتوعى و بردو ألفت و اخرجت ال 2 ديودراما
و كمنتج ؟
ال 6 افلام بتوعى كلهم كانوا انتاجى و انتجت مسرحيتين من ال 18 هما ( مين المسئول ) و ( فازتى بهدلتنى )
ازاى بتقدر تنتج اعمالك ؟
من خلال شركتى MR Production و دايما بحرص انى اوصل فكرة ان مش كتر الفلوس هى اللى تطلع عمل حلو , ممكن بأقل امكانيات نقدر نطلع عمل تحفة كل الناس تشوفه و تحبه , و كمان جودته تكون قريبة من افلام السينما اللى بتكلف ملايين
و كستاند اب كوميديان ؟
انا شاركت فى مهرجان كيميت كوميدى و ده مهرجان للستاند اب كوميدى و اخدت المركز السادس من 40 مشترك و دى كانت حاجة كبيرة بالنسبالى لانها كانت اول مرة فى حياتى اعمل ستاند اب كوميدى , و شاركت فى ندوة نظمتها اسرة (هنقدر ) فى الكلية عندنا و كان حاضرها حوالى 100 طالب او اقل شوية و ده يعتبر رقم كبير اعتقد و ان شاء الله هكمل و هعمل عروض اكتر و احسن
نقدر نشوف الافلام دى فين عشان الناس اللى متعرفكش تشوفك و تعرفك ؟
على اليوتيوب , لو كتبتوا مارك رياض بس على اليوتيوب هيظهر كل حاجة عملتها و يارب تعجبكم
ايه الجوايز او التكريمات اللى حصلت عليها ؟
محصلتش على ولا جايزة و كل التكريمات اللى حصلت عليها كانت شهادات تقدير عن كل عرض عملته سواء تبع كليتى او برة الكلية
بتتضايق من النقد ؟
محدش بيتضايق من النقد لو كان بناء , اكيد بكره من النقد الهدام بس مع الوقت بقى لو فى اى نقد هدام ولا بهتم به اساسا و بركز مع الاراء الايجابية
بعيدا عن الدبلوماسية .. اهلاوى و لا زمالكاوى ؟
اهلاوى
مفكرتش تقدم فى اى مسابقة اكتشاف مواهب ؟
اول ما اخلص الدراسة هبدأ فعلا اعمل ده
ازاى اى حد يقدر يتابعك و يتابع اعمالك ؟
على صفحتى الرسمية على الفيسبوك اسمها ( ( Mark Riad , فيها كل حاجة بعملها و صور العروض و كل الفيديوهات و الافلام
ايه اخر اعمالك ؟
اخر اعمالى انى بذاكر عشان اتخرج ( ضاحكا ) و من وقت للتانى بعمل فيديو ساخر مثلا عن كليتى او عن اى حاجة بنعيشها فى حياتنا اليومية , لكن مسرح او افلام مش بعرف حاليا عشان مشغول بالدراسة
حابب تقول ايه فى نهاية حوارنا ؟
كنت مبسوط بالحوار الجميل ده و اتمنى انه يكون فتحة خير عليا و انا نفسى اتبسطت من الاسئلة و اتمنى ان شاء الله ان خطواتى الفنية الجاية تبقى احسن و احسن و ادعيلى اتخرج بقى ( ضاحكا )
