يارب فرحه
هو مين فينا بيحتاج التانى الفرحه اللي بتحتاجلنا ولا احنا اللى بنحتاجلها ؟
مين اللى بيقابل التانى الاول ؟؟!
واحنا الاتنين بنقابل بعض فيه فئه من الاشخاص بتبقي الفرحة جنبها بس هى مش شايفاها وبيكونوا فى حالة غضب او اكتئاب طب ماهى جنبك !
شيل الستارة السودة وانت هتشوفها كويس
اوقات الفرحة بتحب تلاعبنا استغمايه عشان ندور عليها شوية نتعب ونلاقيها وشوية تانيه نلاقيها سبقتنا
احنا كبنات يعنى او معظمنا اقل حاجه بتفرحنا حتى لو كانت مصاصة !
مسج من حد مش متوقع بتفرحنا
كلمة حلوة بتفرحنا
ضحكة صافيه من القلب بتفرحنا
بس احنا كبشر معقدين شوية في فرحنا احنا بقينا ننتظر الحاجات المبهرة اكتر عشان تفرحنا في حين انه فيه حاجات صغيرة اوى بتفرح
انك لسه بصحتك ،انك اجتماعى ، او انك معاك اخوات ،والدك و والدتك كويسين ، انك لسه بذاكرتك وفاكر حتى لو كانت مواقف مؤلمة!!
اول مره كان يجيلى بوكيه ورد من اصحابي من 5 سنين من فرحتى صرخت جامد وانا مبسووطة اوووى ومن فرحتى بيه احتفظت بيه حتى الان
اول بوكس شيكولاتة و ورد من الشخص اللى بحبه احتفظت بالورق بتاعه من فرحتى
لو حبينا نوصف الفرحه فهى عاملة زى الشخص اللي لما بيجى ياكل شيكولاتة بيحس بتناغم رهييب والغريب ان الاحساس ده بيبقي عنده ف كل مرة بياكل فيها الشيكولاتة!
يارب فرحه تنسي كل هم وتعب
فرحه تخلي القلب سعيد
تقريبا كده اللي بيكون عايز يفرح مش هيستنى الحاجات المبهرة عشان تفرحه هيفرح باقل حاجه
ماتفرح بقي ♡
بارب فرحنا جميعا الى الابد