وبعدين ياريس

كتب : هانى الجزيرى

وبعدين ياريس فى الداخلية وأمناء الشرطة اللى عاملين مصائب مع الشعب وماحدش عارف يلمهم

ينفع الدكاترة تنضرب فى المستشفيات. وفى الآخر يعمل محضر ضد. ونمرمط الدكاترة فى النيابات

عشان حتة أمين شرطة.

هل نحن فى مملكة أمناء الشرطة

وبعدين فى تعديات الداخلية؟ بلطجة غير مبررة ياريس

إحنا مش مستحملين. ومش حنسيب الناس دى تفرض ثقافتها علينا.

 شوف وزير الداخلية وإتكلم معاه

وبعدين ياريس فى الأحكام العجيبة

أبشع جريمة للإخوان هى قسم كرداسة. إيه اللى حصل؟  جريمة واضحة زى الشمس. كيف تعاد المحاكمة. لا أشكك فى النقض. لكن ماقبل النقض. إيه اللى خللى النقض يعيد المحاكمة. لماذا وصلت إلى قبول النقض أكيد هناك أياد خفية. ياريس فيه حاجة غلط.

شوف وزير العدل وإتكلم معاه

وبعدين ياريس فى مرتضى منصور شتم أربعة فى يوم واحد. وبيهدد شعب مصر. وفرحان بنفسه ويقول لك أنا معايا 84 ألف صوت بيهددنا بيهم. شتم عمرو أديب وشتم فرج عامر. وشتم أنور عصمت السادات وشتم محمد فايق. الراجل الكوباره. وعايز يحتل ميدان التحرير. وطايح فى خلق الله. هو نسى العلقة اللى خدها فى الميدان  وبيقول انا مستشار غصب عن الطخين. مع أنه محامى فقط وإستقال من سلك القضاء هو ياريس كل واحد دلوقتى بيقول على نفسه مستشار حتى بتوع التحكيم الدولى .

 عايز أفكرك ياريس مرتضى إتحبس قبل كده عشان تطاول على المحكمة. آه والله خد سنه. بس باين مش كفايه.

شوف رئيس مجلس الشعب وإتكلم معاه

أما حكاية السمك اللى بيموت دى بقى حكاية تانية خالص. وكمان التماسيح اللى طالعه لنا فى المقدر جديد.. طب ودى حتكلم فيها مين ياريس أصل مافيش وزير للسمك ولا التماسيح

شوف وزير الرى على وزير الزراعة وإتكلم معاهم

طب والعيال اللى بتتحاكم عشان داعش. 4 عيال عملوا مسرحية بقدرة قادر حولوها إزدراء أديان. عيال صغيرة يتحبسوا؟ شوف ياريس مين اللى قدم البلاغ. ومين اللى قبض على العيال ومين اللى حقق معاهم ومين اللى أصدر الحكم. ولا هما عشان مسيحيين لايعتبروا أطفال قصر.

وبالمرة بقى مادام وصلنا لبنى سويف فيه بنت قاصر فى المنيا إختفت. وكل يومين فيه مشكلة من هذا النوع. وإحنا بنسأل إشمعنى المنيا. ودايما سمالوط. بالمرة إسأل المحافظ ومدير الأمن

وأسيوط فيها واحد بلطجى فى البرارى بيفرض جزية على المسيحيين وإتاوه على المسلمين والناس عارفاه فين مدير الأمن ؟ فين المحافظ. مافيش!

شوف وزير الحكم المحلى وإتكلم معاه

أما الكوبرى اللى إتهد فى سوهاج. ده إختراع مصرى جديد لنج. فى 7 شهور كوبرى يقع. ياعينى على السرقة. هات بقى الراجل بتاع النقل اللى قال لك المطبات وتكسير الشوارع بيقلل الحوادث.

وبعدين ياريس

احنا مؤمنين بثورة 30 يونيو وبقيادتك. وواثقين فيك. بس اللى بيحصل ده مش طبيعى. ومش عادى.

إحنا نستحمل غلاء الأسعار. وضيق المعيشة. وقلة فرص العمل. نستحمل ولادنا اللى رافضين الوضع ونهديهم. نستحمل الإعلاميين إياهم وأدينا بنتفرج. ياخدوا ملايين وكل واحد فيهم يطلع يهبل شوية ماشى. نستحمل مجلس شعب وكوميديا سوده. أدينا بنضحك. أحسن من الأفلام القديمة اللى حفظناها.

إنما بلطجة. وفرض ثقافة قذرة علينا لأ. وزراء مابيفهموش ماينفعش. نستحمل عشان مصر نعم. المحترم يتحبس والضلالى لأ. يبقى لا والف لا.

أنا بأقول بدل ماتكلم الوزير فلان والوزير علان . غير الوزارة الكئيبة دى ياريس . دى غالبيتها مابتفهمش . ده احنا بنقول فين أيامك يامحلب . 

طبعاً مش كلها بس محتاجة تغيير كبير علشان كمان تريحنا وتريح نفسك شوفلك حل فى الطابور الخامس اللى مالى كل المصالح الحكومية وموقف حال البلد كلها

إلحق ياريس. البلد بتضيع من الداخل. آه الداخل ده عايز مقالة تانية. عشان نتكلم عن المتربصين