حكايتي مع كنكة القهوة
بعد ان تخرجت من الجامعة وانتهت فترة التجنيد كان لازم أبحث عن فرصة عمل علشان أقدر أساعد اسرتي ووالدي ال تعب علشان كتير وكمان ابني مستقبلي . قعد مع نفسي أفكر اعمل دا اذاي . طيب أسافر للخارج ولا أشوف شغل في مصر . المهم قلت يا واد يا جمال روح الغردقة بيقولوا فيها شغل الكلام دا كان سنة 1994 خد بعضي وتقريبا أستلفت مائة جنيه وركبت الأتوبيس الي الغردقة . نزلت عند جماعة بلدياتي . وتاني يوم بدأت رحلة البحث عن العمل . دخلت قرية سياحية اسأل علي شغل قالوا في شغل لكن عليك أن تقابل مديرة القسم علشان توافق عليك . دخلت عليها صباح الخير . لقيت نفسي قدام ست انيقة تشرب السيجار ولابسه ميني جب وحاطه رجل علي رجل . اول ما شفتها قلت لنفسي وقعتك سودا يا ابن رشدي . اول القصيده كفر . بصت لي وابتسمت وقالت صباح النور . قلت لها عاوز اشتغل . قالت وانا موافقة . اتكلمت معايا شوية . وقالت روح قدم اوراقك في شئون العاملين وبكره الصبح هيكون شغلك معايا هنا في المكتب . قلت لها توكلنا علي الله . روحت شئون العاملين . الموظف ال هناك قال لي اخلع بهدومك انت باين عليك طيب وابن حلال اوع تشتغل معاها قلت له ليه يا عم دا باين عليها ست طيبة .. قال لي انت حر . المهم قلت له خلاص انا اسمع كلامك انا مش ناقص انا عاوز اكل عيش بالحلال. هات الورق والسلام عليكم مش شغال .. مشيت وانا بلف علي الشغل لقيت كافيتريا كبيرة جدا . دخلت قلت لهم عاوز المدير . علشان عاوز اشتغل . قابلني المدير حكي معايا شوية وقال لي تعرف تعمل قهوة . قلت له انا استاذ . قال لي طيب عاوزك تعمل لي فنجان من ايدك علشان اجربك . هبااااااا طبعا انا معرفش اعمل قهوة . دخلت البوفيه لقيت شابين واقفين قلت لهم صاحب الكافتريا عاوزني اعمل له قهوة . أخذت الكنكة ووقفت أفكر اذاي صاحبي هشام فريد كان بيعملها واحنا في الجامعة . الشباب لاحظ حيرتي . المهم اخذت الكنكة ومليتها ميه وحطيت البن وسبتها لما غلقت وجبت الفنجان وحطيت فيه السكر وحطيت البن في الفنجان وقلبت السكر . حطيت الفنجان علي الصنيه وبصيت جنبي ملقتش الشباب فجأة لقيتهم وقعين في الأرض من الضحك . عرفت علي طول أن انا عكيت في القهوة . دخلت علي الراجل صاحب الكافتيريا لقيت الرجل دموعه نازله من الضحك . لانه كان مراقبني من شباك المكتب .. حطيت القهوة قدامة وسكت بص ليا وقال هات شنتطك وتعال اشتغل من الان . طبعا انا افكره بيتريق عليا . هو قرأ تفكيري قال لي .. انا فعلا عاوزك تشتغل . قلت له اذاي انا معرفتش اعمل القهوة . قال انا اختبرت استعدادك للعمل وليس معرفتك بعمل القهوة.. لأنك قبلت علي نفسك تكون مؤهل عالي وتحرج نفسك معايا ومع الشباب ال موجودين وتحاول وتجتهد تعمل القهوة . كدا عرفت انك عاوز تشتغل وتأكل عيش .. قلت له خلاص اتفقنا علي الراتب حوالي 160 جنيه غير البقشيش ال يرزق بي ربنا الكلام دا سنة 1994 واتفقت معاه أن من صباح الغد أكون معاه . روحت البيت صعبت عليا نفسي قلت طيب اذاي اروح اشتغل والشباب ال هناك يضحك عليا لا انا مش رايح تاني . قمت تاني يوم الف علي شغل تاني . مفيش فائده مش لاقي يوم والتاني والتالت خلصت ال مائة جنيه ال اسلفتها علشان اسافر بيها الغردقة . مع الساعة 8 المسا جعت بلف علي لحم بطني النهار كله فتحت المحفظه لقيت جنيه واحد بس . وقفت أفكر وأفكر وأفكر . طيب اعمل ايه اكل بالجنيه ولا أحافظ عليه . بصيت في المحفظه لقيت نوته مكتوب فيها رقم تليفونات . بقلب فيها لقيت صديقي المهندس المنياوي عادل جوزيف شغال في شركة اوراسكوم ورقم تليفون السكن . مكنش في محمول طبعا . فرحت جدا . امل أخير ليا. جريت علي السنترال . طلبت رقم عادل جوزيف . الوو ايو مين معايا انا جمال رشدي يخرب عقلك يا جيمي اخبارك ايه قلت له الحقني المكالمة هتخلص وانا بالغردقة اشرح لي سكنك فين انا جي لك . قال لي مش هتعرف توصل قلت له يا عم قول انت فين شرح المكان . قفلت الخط وضاعت خمسين قرش وبقت معايا خمسين قرش فقط . قعد الف في الشوارع لمدة ساعة علي رجلي . خبطت علي الباب فتح صديق المهندس عادل . قلت له عادل جوزيف لو سمحت لقيت من جوه عادل بيقول تعال يا جيمي دخلت اجري عليه اخذته بالحضن قلت له انا جعان . جاب ليا اتعشيت وشربت شاي .. حكيت معاه ال حصل . ضحكنا وهزرنا كعادتنا . قال خلاص انا شغال في شركة اوراسكوم في موقع اسمه الجونة بعيد عن الغردقة 25 كيلو مفيش مواصلات لهناك إطلاقا ..قلت له إطلاقا مفيش أي وسيلة مواصلات قال لا غير سيارة الشركة بتوصل الموظفين الصبح وتجيبهم آخر النهار . ومفيش غير بعض قلابات الظلط والرمل بتعدي علي الطريق بتاع الجونة . اتفقنا ان بكره آخر النهار اعدي عليه علشان يكون سأل ليا علي شغل في الشركة . روحت كالعادة عند بلدياتي قعد الليل كله مش قادر انام كل ما افتكر الخمسين قرش ال في جيبي أقوم مفزوع . وأفكر طيب اعمل ايه وارجع المنيا اذاي والراجل ال أخذت منه ال مائه جنيه اعمل ايه معاه . المهم جبت الصبح بالعافيه .. مع الصبح سألت علي طريق الجونه مشيت حوالي ساعة وصلت اول الطريق انتظرت قلاب رمله وظلط . لقيت قلاب كبير قلت للسواق الله يخليك خدني معاك لحد مدخل الجونه . السواق من قنا ابن حلال قال اركب يا ولدي فطيت ركبت في الصندوق من ورا . بعد اكتر من ساعة وقف القلاب . قلت للسواق اول مدخل الجونه فين قال يخرب عقلك احنا فتناه ورا بحوالي خمسه كيلو . نزلت قلت له ولا يهمك انا ارجع مشي . قال لي يا ولدي الجو حر عليك ومش هتقدر توصل . قلت له يا عم إنشاء الله اوصل رجعت مشي بعد حوالي ساعة ونصف وصلت المدخل بتاع الجونة .. كان من بداية المدخل الي الشركة حوالي ثلاثة كيلوا مشيت المهم . حاولت الشمس والجوع والتعب يمنعون عن استكمال مشواري قلت ابدا .. مع الساعة واحدة الظهر كنت في موقع الشركة . اول واحد اقابله كان المهندس عادل جوزيف . اول ما شافني ضحك قال عارفك هتيجي . بصيت له وسكت عرف اني تعبان ومرهق جلست معه بالمكتب جاب ميه وسندوتشات اكلت قال لحظة واحدة ادخل للمدير اشوف لك شغل .. دخل للمدير وبعد شوية خرج زعلان .
. عرفت أن مفيش شغل .. قلت له ايه الحكاية يا عادل قال بقول للمدير واحد زميلي عاوز اشغله قال مفيش شغل . غير مساعد كهربائي او سباك . صمت .. قال لي جمال خد فلوس وارجع المنيا متبهدلش نفسك .. قلت له عندي فكره انا شايف في مواقع عمل كتير للشركة انا اخد خطاب لأي مدير موقع واروح عنده يمكن ألاقي عنده شغل إداري ..قال ادخل انت قول له انا مش هحرج نفسي معاه تاني . دخلت علي المدير عرضت عليه الفكره وافق الراجل وكتب لي ورقه لمدير آخر . وأنا بأخذ من يده الورقه كان شخص جالس معاه هذا الشخص هو العملاق ومثلي الاعلي المهندس سامح أبو تار .. فجاءة المهندس سامح قال لي أنت اسمك ايه قلت له جمال رشدي .. قال طيب من فضلك انتظرني لحظه بره المكتب . بعد دقائق خرج المهندس سامح . أخذني في يده في التو حسيت اني مع اخي او صديقي الذي أعرفه من سنوات إنسان راقي مهذب مهاب قوي صادق امين . ابن بلد صعيدي . أخذني من يدي وقال لي صباحا الساعة 8 تيجي علي المكتب بتاعي علشان انا عاوزك تشتغل معايا .. نظرت إليه في صمت .ورجعت حكيت المهندس عادل . قال لي المهندس سامح مدير تشطيبات الموقع رجل راقي ومحترم ومهذب وقوي .. قلت له انا حسيت بكدة في شخصه. وذهبت الي المنزل في الغردقة .. وصباح اليوم الثاني قمت بدري وركبت قلاب الرمله والظلط. وذهبت الي مكتبه في الثامنه ونصف .. صباح الخير يا باشمهندس سامح . صباح الخير يا جمال قلت له انا جيت قال لي انا قلت لك الساعة 8 . يا باشمهندس انا معرفش مواصلات انا ركبت قلاب الظلط.. قال اذاي مركبتش سيارة الشركة قلت له انا معرفش حد ولا أعرف مكانها .. أرسل المهندس سامح الي المسئول الإداري وقال له غدا جمال يركب معاك السيارة بتاع الشركة علشان هو هيشتغل معايا رجعت تاني في قلاب الظلط وتاني يوم من الفجرية انتظرت سيارة الشركة وركبت فيها ودخلت موقع الشركة علي مكتب المهندس سامح .. صباح الخير يا باشمهندس . صباح الخير يا جمال ..وابتدات رحلتي مع أوراسكوم والادارة والعمل مع العملاق سامح ابو تار… وتلك الرحلة سوف اسردهها في مقالات تأليه
