زى ماجبت حق شهداء ليبيا هات حق أمك المنياوية
القاهرة 27 مايو 2016
كتب : هانى الجزيرى
مستنيين ياريس . مستنيين خطوة انت حتاخدها وكلنا متوقعينها
إحنا بنحبك ياريس وواثقين فيك
إحنا ظهيرك الحقيقى وإحنا اللى محافظين على مصر. إحنا ولاد البلد دى اللى نزلوا فى 30 يونيو عشان نفدى مصر بأرواحنا. رجالة وستات وأطفال. مسلمين ومسيحيين. أغنياء وفقراء . مثقفين وبسطاء
كلنا معاك ياريس .
(بس خللى بالك . عايز أقول لك حاجه) . فيه ناس كتير بتحاربك . فيه ناس غيرانه من الحب اللى بيننا . فيه ناس بتكرهك وتكرهنا . فيه ناس بتكره مصر . وإحنا مصر . وإنت رمز مصر . اللى محير العالم كله فى كل تصرفاته . فيه ناس كتير مش فاهماك .
نرجع لأحداث المنيا . والناس اللى عايزة توقع مصر
المسئول اللى قال ان الحادث بسيط والإعلام اللى كبره . ده عايز يخربها ياريس . وأساسا ماعندوش نخوه ولا يصلح للمسئوليه
المسئول اللى أنكر الواقعة من أساسها . ده جبان مش قادر يواجه
المسئول اللى قبض على الراجل اللى اتكلم وشهد بالحق وقال عنه أنه بيثير الفتنه ده راجل خايب ويستحق الجزاء لأنه ساب الراجل الذى روج الشائعة وكذب والتى شهدت زوجته ضده .وقبض على شاهد بالحق .
وكل من تهاون فى إظهار الحق او تورط فى إخفاء الحقيقة من المسئولين مدان ولايستحق موقعه
ياريس كل ده بيصب فى صالح الإرهاب ويعمل على تفتيت مؤسسات الدولة . وهز الثقه بين القيادة ومواطنيها . ولا عايزهم يقولوا ان هما اكبر من الدولة وفوق القانون .
إحنا مش حنفقد الثقه فيك أبداً . لكن اللى بيحصل ده مايتسكتش عليه . ومايرضيش حد .
(طب أنا حأقول لك على حاجه ). (انت مش شايف) ان ده بيهزصورة مصر. وفى كل مره بيقولوا ان المنيا خارج نطاق السيطرة .
مستنين ياريس منك رد الفعل القوى الرادع ليس فقط ضد الإرهابيين ولكن ضد المقصرين أيضا لأنهم اخطر من الإرهابيين .
وإحناواثقين فيك .( أقول تانى) إحنا واثقين فيك وعارفين أن عندك ردود غير تقليدية وخطوات رادعة غير متوقعه . .وأقول تانى إحنا بنحبك ياسيسى .ولا إنت مش عارف إنك نور عينينا . ربنا يوفقك ويسدد خطاك . وينصرك على من يعاديك
